ES · EU
Egitarauaren aurrerapena: 80. Donostiako Musika Hamabostaldia

Egitarauaren aurrerapena: 80. Donostiako Musika Hamabostaldia

12.04.2019
ikusi
berri
guztiak
>
<Hurrengo Berria
  • Ainhoa Arteta & “Madame Butterfly”
    Ainhoa Arteta Puccinirekin itzuliko da Musika Hamabostaldira. Beste gai askoren artean, sexu arteko botere harremanak eta menderatzea jorratzen dituen opera honetako paper nagusia interpretatuko du.

  • Elkarrekiko oso ezberdinak diren hiru pianista, eta hari instrumentista (biolina eta biola) nabarmenenetariko bi
    Hamabostaldiak elkarrekiko ezaugarri oso desberdinak dituzten hiru pianista elkartuko ditu: Seong-Jin Cho hegokorearra, 2015eko Chopin lehiaketaren irabazlea, Javier Perianes, Musika Hamabostaldian dagoeneko ohikoa den musikaria, eta Khatia Buniatishvili pianista birtuoso gaztea. Gainera, Antoine Tamestit, egungo biola handienetariko bat, eta Hillary Hahn biolinista estatubatuarra ere etorriko dira. Azken honek hiru Grammy irabazi ditu eta munduko interpretatzaile errespetatuenetariko bat da.

  • Dantzarekin bi hitzordu
    Víctor Ullateren balleta produkzio berriarekin itzuliko da: “Antígona”; bertan, Lucía Lacarra dantzari eta zuzendari artistiko lanetan arituko da. Aurtengo jaialdiak bigarren dantza ikuskizun bat ere izango du bere hitzorduen artean, Ballet Flamenco de Andalucía konpainiaren “Naturalmente Flamenco”.

  • Erakusketa San Telmo Museoan
    Musika Hamabostaldiaren 80. urteurrena dela eta, San Telmo Museoak jaialdiaren ibilbidea bere hasieratik gaur egun arte gogoratuko duen erakusketa antolatuko du.

80. Musika Hamabostaldia abuztuaren 1ean hasi eta abuztuaren 31n bukatuko da: 31 egun horietan 90 proposamenetik gora eskainiko ditu jaialdiak. Egitaraua osatzen duten 10 zikoak Donostian gauzatuko dira nagusiki, baina proposamen hauetako batzuk Gipuzkoako, Arabako, Nafarroako eta Iparraldeko hainbat herritan ere gozatu ahal izango dituzte entzuleek.

Mahler Chamber Orchestrak emango die hasiera Kursaal Auditorioko kontzertu sinfonikoei (abuztuak 1), Jacob Hrusa zuzendari txekiarraren batutapean. Bambergeko Orkestra Sinfonikoko zuzendari titularra izendatu dute berriki. Inaugurazio kontzertuan, Seong-Jin Cho pianista gaztea arituko da, 2015eko Chopin Piano Lehiaketako irabazlea. Claudio Abbadok sortu zuen ganbera orkestrak Donostiako Orfeoia izango du lagun bere bigarren emanaldian (abuztuak 2), Dvoraken “Te Deum” eta Schumannen “2. sinfonia” barne hartzen dituen programarekin.

2012ko Hamabostaldian parte hartu ondoren, Orchestre de Paris programa bikoitzarekin itzuliko da, Daniel Harding zuzendari titularraren gidaritzapean. Emanaldietatik lehena (abuztuak 20) izaera programatikoko kontzertua izango da. Berliozen “Harold Italian” joko dute, konpositorearen 150. heriotza urteurrenean, Lord Byronen poema batean inspiratutako obra. Beethovenen “Pastorala” ere interpretatuko dute, naturaren inguruko programa osatuz. Bigarren saioan dimentsio handiko kontzertua eskainiko dute (abuztuak 21): hiru bakarlari, Donostiako Orfeoia eta Orfeoi Txikia, orkestra osoa eta ganbera orkestra bat arituko dira elkarrekin. Brittenen “Gerrako Requiema” interpretatuko dute, XX. mendeko obra gorenetariko bat. Autoreak gerran zehar suntsitutako Coventryko katedrala berriz kontsakratzeko konposatu zuen requiema. Haren estreinaldirako bi Mundu Gerretan parte hartu zuten hiru herrialdetako bakarlariak elkartzen saiatu zen: Alemania, Britainia Handia eta SESB, azkenean helburu hori erdietsi ez bazuen ere.

Bartoken “Bizar Urdinen gaztelua” operaren kontzertu bertsioa izango da Euskadiko Orkestra Sinfonikoak (abuztuak 24), Rovert Treviño titularraren batutapean, eta Andra Mari Abesbatzak eskainiko duten kontzertuko pieza nagusia. Opera honek gizakiaren alderik makurrena arakatzen du, baina, era berean, XX. mendeko opera bikainenetarikoa da. Programa Sorozabalen gaztaroko obra batek eta Ravelen pieza batek osatuko dute.

Deutsche Kammerphilharmonie Bremen orkestrak (abuztuak 27) molde erromantikoa duten orkestretan azken urteotan ezohiko bihurtu den errepertorioa ekarriko du. Ganbera taldeak Bachen biolinerako kontzertuak interpretatuko ditu, konpositore honen obrak hainbat alditan grabatu dituen Hillary Hann birtuosoarekin.

Abuztuaren 30 eta 31n, London Philarmonic Orchestrak piano ziklo nabarmenena interpretatuko du, Beethoven, Juanjo Menaren zuzendaritzapean eta Javier Perianes pianistarekin. Zuzendariak eta bakarlariak Europako hainbat hiritan eskaini dituzte kontzertuok, eta urteak dira biek harreman artistiko emankorra dutela.

Bere opera hitzorduari leial, 80. Musika Hamabostaldiak Pucciniren “Madame Butterfly” programatu du abuztuaren 13 eta 15erako, obra liriko eszenaratuenetariko bat. Palau de les Arts de Valenciaren ekoizpenean, 40. hamarkadan girotuta dago istorioa, Bigarren Mundu Gerraren erdian. Ainhoa Arteta sopranoak protagonistari ahotsa emango dio (Cio-Cio San); Bartzelonako Liceu antzokian interpretatu berri du papera. Ondoko izenek interpretatuko dituzte gainerako pertsonaiak: Marcelo Puente (Pinkerton), Gabriel Bermúdez (Sharpless), Cristina Faus (Suzuki), Paco Vas (Goro), Isaac Galán (Príncipe Yamadori). Easo Ahots Mistoen Abesbatza ere arituko da, besteak beste. Giuseppe Finzik Euskadiko Orkestra Sinfonikoa gidatuko du.

Azkenik, Víctor Ullate Ballet Kursaal Auditorioko dantza hitzordu tradizionalaz arduratuko da. “Antígona” (abuztuak 17 eta 18) da haien produkzio berria eta Lucía Lacarrak interpretatuko du paper nagusia, Víctor Ullatek berak sortutako koreografia batekin. Donostiara heldu baino aste batzuk lehenago estreinatuko dute ikuskizuna. Gainera, Víctor Ullate konpainiako zuzendari artistiko izendatu berri dute Lacarra.

Victoria Eugenia Antzokiak, bere aldetik, elkarrekiko oso ezberdinak diren bi proposamen hartuko ditu:

Khatia Buniatishvili izango da Victoria Eugeniako lehen hitzorduko protagonista (abuztuak 5). Schubert, Liszt eta Stravinskyren obrak, zehazki Petrushka Balletaren transkripzioa, interpretatuko ditu. “Georgiako gazte asaldatailea” deiturikoa inor epel uzten ez duen pianista nahasezina da. Birtuosoa, interpretazioan heldutasun handikoa, izaera sendokoa… Horiek dira kritikak bere talentua deskribatzeko erabili dituen kalifikatzaileak.

Bigarren hitzordua Ballet Flamenco de Andalucía konpainiak eskainiko du, bere “Naturalmente Flamenco” ikuskizunarekin. Hainbat flamenko palotan zehar gidatuko ditu ikusleak, ilusioak, sentsibilitateak, ezagutzak eta teknikak bat egiten duten emanaldian: hain zuzen, Jerezko Jaialdian estreinatu berri dute, berebiziko arrakastarekin.

 

Ziklo paraleloak


80. Donostiako Musika Hamabostaldiak bere ohiko ziklo paraleloak ere eskainiko ditu: Antzinako Musika, Musika Garaikidea, Organoa, Interprete Gazteak, Ostegun Musikalak San Telmon, Hamabostaldia Aitzaki, Inaugurazio eguna eta Haurren Eguna. Zikloon egitaraua datozen asteotan emango du aditzera Musika Hamabostaldiak.

 

Abonuen eta sarreren salmenta

Datorren ostegunean, apirilak 25, bukatuko da epea Hamabostaldiko Lagunek abonuak eta sarrerak eskatzeko.

Sarreren salmenta orokorra ekainaren 4an jarriko da abian, www.quincenamusical.eus webgunearen bidez eta Kursaal nahiz Victoria Eugenia Antzokiko leihatiletan.

 

>>> Egitaraua ikusi

Quincena Musical de San Sebastián
Donostiako Musika Hamabostaldia

Zurriola Hiribidea 1
20002 Donostia / San Sebastián

Tel.: 943 003 170

© Quincena Musical