Musika Hamabostaldiaren Organo Zikloaren edizio berria abuztuaren 1etik 13ra bitartean egingo da Donostian eta Gipuzkoako beste herri batzuetan, eta soinuzko eta ikusizko esperientzia ahaztezina agintzen du. Guztira 14 kontzertu izango dira, horietatik hamahiru nazioarteko beste horrenbeste organo-jotzaileren eskutik eta bat Organo Erromantikoaren Nazioarteko 41. Ikastaroan parte hartzen duten ikasleek eskainitakoa, topaketari amaiera emateko. Ana Belén Garcíak, Zikloaren koordinatzaileak, egitarauari eginiko oharretan jasotzen duenez, aurtengo ediziorako diseinatutako programazioak publikoa “unibertso batean sartuko du, non ‘Instrumentuen Erregearen’ handitasunak topo egiten duen sorkuntza garaikidearekin, euskal tradizioaren eta kulturaren aberastasunarekin, eta inprobisaziorako grinarekin. Azken hori gure programazioaren zutabe funtsezkoa izango da, eta beste diziplina batzuekin ere aberastuko da: abesbatzen munduarekin, euskal instrumentu tradizionalekin, bertsolaritzarekin eta dantzarekin”.
Organo Erromantikoaren Nazioarteko Ikastaroaren 41. edizioa da aurtengoa. Aurten Michel Bouvardek emango du, abuztuaren 4tik 8ra, Tolosako Saint-Sernin Basilikako Cavaillé-Coll organo historikoko organista titularra 1996tik eta Versailles Jauregiko Errege Kaperako organista 2010etik. Bost egunetan zehar, ikastaroa Donostiako Koruko Andre Mariaren Basilikako (1863) Cavaillé-Coll organoan egingo da batez ere, eta ikasleek Gipuzkoako beste organo batzuk ere bisitatuko dituzte: Azpeitiko Loiolako Santutegia, Azkoitiko Santa Maria La Real eta Bergarako San Pedro. Abuztuaren 8an, parte-hartzaileek Koruko Andre Mariaren Basilikan eskainiko dute ikastaroa amaitzeko urtero egiten den ohiko kontzertua.
Jarraian, 2025eko Musika Hamabostaldiko Organo Zikloa osatzen duten 14 kontzertuak zehaztuko ditugu:
Ana Belén García (organoa) & Miren Urbieta-Vega (sopranoa) – Abuztuak 1, 20:30. San Ignazio eliza (Donostia): bostheun bat pertsona inguru bildu zituen kontzertu batean, Miren Urbieta-Vega sopranoak eta Ana Belén García organistak Israel López Estelcheren obra bat estreinatu zuten, "Ecos del alma vasca" izeneko egitarauan. Felipe Gorriti, Jesus Guridi, Luis Urteaga eta Pablo Sorozabalen piezak ere interpretatu zituzten.
José Luis Echechipía (órgano) & Gure Kai Dantza Taldea – 2 de agosto, 20:00. Iglesia de Santa María (Deba): "Del foro al coro: la música popular como inspiración organística" izenburupean, eta Debako Gure Kai Dantza Taldearen laguntzarekin, José Luis Echechipíak Bach, Vaughan Williams, Sabater, Torres edo Iker Gonzálezen eta Echechipiaren beraren lanen artean tartekatutako hainbat euskal kantu biltzen zituen programa bat interpretatu zuen kostaldeko herrian.
Juan de la Rubia (organoa) & Jon Maia, Oihana Iguaran (bertsolariak) – Abuztuak 3, 12:30. Tourseko San Martin eliza (Ataun): inprobisazioak egin zituzten "Jentilen Etorrera - Llegada de los Gentiles" eta "Gaueko Ibilaldia-Paseo Nocturno", Joxemiel Barandiaranek bildutako eta Ataungo biztanleek antzeztutako mitologia.
Michel Bouvard – Abuztuak 3, 20:00. Iesuko eliza (Donostia): Musika Hamabostaldiko interprete eta 41. organo ikastaroko irakasleak, omenaldi berezia eskainiko dio J.S. Bachi Iesuko elizan, "Johann Sebastian Bach, architecte et poète" izeneko kontzertuan.
László Fassang – Abuztuak 4, 20:00. San Bizente Eliza (Donostia): organo jotzaile hungariarrak XX. eta XXI. mendeetako inprobisazioetan eta musikan oinarrituko du kontzertua, "Ecstasy" izenburupean. Bach, Mussorgsky, Joan Alain eta Petr Ebenen lanak interpretatuko ditu eta Ligeti eta Bartoken omenezko inprobisazioak tartekatuko ditu.
Shin-Young Lee (organoa) & Verdini Dantza Taldea – Abuztuak 5, 20:00. Artzain Onaren katedrala (Donostia): "Saint-Saënsation" izeneko kontzertuan, Shin-Young Lee hegokorearrak Bach, Widor, Borodin eta Saint-Saënsen obren transkripzioak interpretatuko ditu. Organo musikarekin batera, Verdini Dantza Taldearen dantza izango da.
Wayne Marshall – Abuztuak 6, 20:00. Koruko Andre Mariaren Basilika (Donostia): organista, orkestra zuzendari eta piano-jotzaile britainiarrak "French Masters and Basque Improvises" errezitaldia eskainiko du.
Thierry Escaich & Kea Ensemble – Abuztuak 7, 20:00. San Bizente Eliza (Donostia): “Harmonies celestes” da Thierry organista frantsesak, Parisko Notre-Dame katedraleko organo-jotzaile titularrak, eta Kea Vocal Ensemblek, Duruflé, Messiaen, David Azurza eta Escaichen beraren obrekin, eskainiko duten kontzertuaren izenburua.
Organo Erromantikoaren Nazioarteko 41. Ikastaroko Ikasleen Kontzertua – Abuztuak 8, 20:00. Koruko Andre Mariaren Basilika (Donostia): bost lanegun gogorren ondoren, Organo Erromantikoko 41. Kurtsoko ikasleek amaiera emango diote Hamabostaldiko haien ibilbideari, Michel Bouvard irakaslearekin ikastaroan zehar landu eta hobetuko duten lanen aukeraketa interpretatuko duten kontzertuarekin.
Matthieu de Miguel (organoa) & Louna Carbonell (biolina) – Abuztuak 9, 20:00. Loiolako santutegia (Azpeitia): iaz tronpetaren soinua izan bazen Loiolako Santutegiko Cavaillé-Coll taldekoarekin bat egiten zuena, aurten biolina izango da, Louna Carbonell biolinistak interpretatuta, organoarekin batera joango den instrumentua, oraingo honetan Matthieu de Miguelek interpretatua. "Ambiances sonores" izenburupean, Bach, Händel, Kreisler, Gullmant, Gounod, Widor, Debussy, Pärt, Vierné eta Gandrilleren lan sorta bat interpretatuko du.
Aitor Olea & Bergarako Parrokia-abesbatza – abuztuaren 10a, 18:00. San Pedro Eliza (Bergara): aurten, Organo Zikloa Bergarara lekualdatuko da, San Pedro elizako Stoltz-Frères (1889) organo zaharberrituan, Aitor Olea organo-jotzaile titularraren eskutik. Bergarako parrokiako abesbatzarekin batera, "Euskaldun musikarien organu konposizio hautaketa" izeneko programa aurkeztuko du, Juan Bautista Elustiza, Eustaquio Azkarate-Askasua, Miguel González, Victoriano Balerdi, Jose Maria Usandizaga, Ignacio Mokoroa, Luis Urteaga, Francisco Madina eta Jesus Guridiren lanekin.
Gerardo Rifón & Donostiako Orfeoia – Abuztuak 11, 20:00. Santa Maria parrokia (Tolosa): organista donostiarrak, Donostiako Orfeoiaren ohiko laguntzaileak, askotariko kontzertua eskainiko du beraiekin batera Tolosako Santa Maria Parrokian. "Armonías de fe: un viaje musical a través de siglos de inspiración" izeneko programak Bach, Aita Madina, Mendelssohn, Usandizaga, Mocoroa, Brahms, Fauré, Vierne eta Händelen lanak biltzen ditu.
Paolo Oreni & Oreka TX – Abuztuak 12, 20:00. San Salbador eliza (Usurbil): euskal musika tradizionalak eta birtuosismo organistikoak bat egiten dute Paolo Oreni organistak eta Oreka TXk (Harkaitz Martínez de San Vicente eta Itziar Navarro) txalaparta eta ahotsa eskainiko duten kontzertuan. "Euskal Herriko taupadak: Organoaren eta Euskal Tradizioaren arteko elkarrizketak" erakusketak euskal erritmoen gaineko inprobisazioak eta Mikel Laboa, Bach, Widor edo Liszten lanak uztartzen ditu.
Martin Baker – Abuztuaren 13an, 20:00etan. Jasokundeko Andre Mariaren Parrokia (Azkoitia): organista britainiarrak itxiko du Organo Zikloa Azkoitiko Txalkor Txistulari Taldeak lagunduta. "Idatzitakoaren eta bat-batekoaren artean: organoa euskal melodien gainean inprobisatzen" izenburupean, euskal gaiei buruzko inprobisazioak eta C.M. Widorren pieza handi bat uztartuko ditu.
