80. Donostiako Musika Hamabostaldiaren programazioaren aurrerapena.

2019. urtean Donostiako Musika Hamabostaldiak 80 urte beteko ditu. Hori ospatzeko diseinatuko den programazioan lanean dihardugu. Besteak beste, datorren edizio horretan ariko dira London Philharmonic Orchestra, Juanjo Menaren zuzendaritzapean eta Javier Perianes pianista bakarlari dela, eta Parisko Orkestra eta Donostiako Orfeoia, Daniel Harding zuzendariaren agindupean. Hurrengo Hamabostaldian eszenaratzeko aukeratutako opera da Pucciniren “Madama Butterfly”, San Lorenzo de El Escorialeko Udako Jaialdiarekin koprodukzioan.

Musika Hamabostaldiaren 79. edizioan, edukieraren 91% bete da Kursaal Auditorioa, eta aretoa 6 aldiz bete da 

Donostiako Musika Hamabostaldiak gaur arratsaldean itxiko du bere 79. edizioa, azkeneko kontzertu sinfonikoarekin. Koloniako WDR Sinfonieorchester ariko da Kursaal Auditorioan, edizio honetan bigarren aldiz. Gaur, alemaniar orkestrak Berliozen “Requiema” joko du, Donostiako Orfeoia eta Maximilian Schmitt tenorra lagun dituela, Jukka-Pekka Sarasteren zuzendaritzapean. Kontzertu horrekin amaituko da, aurtengoan ere, kontzertuak zein jarduera paraleloak kontuan hartuta, 90 emanalditik gora bildu dituen edizioa.

Kursaal Auditorioa 6 bider bete da: “Kreazioa” (abuztuaren 2a eta 3a), Rotterdams Philharmonisch Orkest (abuztuaren 24a), Budapest Festival Orchestra eta Donostiako Orfeoia (abuztuaren 27a), “Amoria” (abuztuaren 29a) eta Koloniako WDR Sinfonieorchester eta Donostiako Orfeoia (irailaren 1a).
 
Ekoizpen propioaren aldeko apostua indartu da: Hamabostaldiak ekoiztu du aurten aukeztutako “Italiarra Aljerren” opera, Haurren Egunean estreinatu  “Itsasotik eskolara” ikuskizuna sustatu du eta Kukaik Arantzazurako sortutako “Adio” bultzatu du, besteak beste.
 
Hamabostaldiak erakutsi du beste behin bertako kultur erakundeentzako eta nazioarteko orkestra zein interpreteentzako topagune gisa duen garrantzia; hain zuzen, horri esker aritu da Easo Eskolania Katia eta Marielle Labèquen “Amoria” proiektuan.

Donostiako Musika Hamabostaldiak gaur arratsaldean itxiko du bere 79. edizioa, azkeneko kontzertu sinfonikoarekin. Koloniako WDR Sinfonieorchester ariko da Kursaal Auditorioan, edizio honetan bigarren aldiz. Gaur, alemaniar orkestrak Berliozen “Requiema” joko du, Donostiako Orfeoia eta Maximilian Schmitt tenorra lagun dituela, Jukka-Pekka Sarasteren zuzendaritzapean. Kontzertu horrekin amaituko da, aurtengoan ere, kontzertuak zein jarduera paraleloak kontuan hartuta,  90 emanalditik gora bildu dituen edizioa.

Kursaal Auditorioa izan da Musika Hamabostaldiaren gune garrantzitsuenetako bat. Auditorioa 6 bider bete da erabat eta %91ko betetzea lortu da. Guztira, leihatilan bildutako diru-kopurua 952.000 euro gordinekoa da. Ikusle-kopuruari dagokionez, ia 37.000 pertsona izan ziren jaialdiaren 79. edizioko emanaldietan.

Auditorioan programatutako emanaldien artean, azpimarragaria da La Fura dels Baus konpainiaren “Kreazioa” ikuskizunak (abuztuak 2 eta 3) lortutako arrakasta: sarrera guztiak agortuta abiatu zuten jaialdia. Halaber, erabat bete ziren honako kontzertuak: Rotterdams Philharmonisch Orkest (abuztuak 24), Budapest Festival Orchestra eta Donostiako Orfeoia (abuztuak 27) eta “Amoria”ren, Katia eta Marielle Labèquen egitasmo berriena; horretan euskal musikaren 500 urte gainbegiratzen dituzte, euskal musikari gailenek osatutako talde batek lagunduta. Gaur, 79. edizioari amaiera emateko, Koloniako WDR Sinfonieorchester orkestrak eta Donostiako Orfeoiak emango duten kontzerturako sarrerak ere agortu dira honezkero. 

Edizio honetako bigarren proposamen eszenikorako Rossiniren izenburu bat berreskuratu zen, haren heriotzaren 150. urteurrena betetzen den honetan: abuztuaren 11n eta 13an, Musika Hamabostaldiak “Italiarra Aljerren”, Hamabostaldiak berak, Buenos Airesko Colón Antzokiak eta San Lorenzo de El Escorial-eko Udako Jaialdiak ekoitzitako bertsioan. Joan Anton Rechik egindako berrirakurketa berriak operaren mamia 40ko hamarraldira eraman eta, nolabait esateko, antzezlan baten barruan kokatzen zen eszenaratzea aurkeztu zuen, errebista kutsua zuena.

Kursaal Auditorioa, gainera, berrelkartzeetarako eta ospakizunetarako toki bihurtu zen eta une gogoangarriak bizi izan ziren bertan. Abuztuaren 18 larunbatean, Euskadiko Orkestra Sinfonikoak eta Andra Mari Abesbatzak eman zioten hasiera aurtengo ziklo sinfonikoari, Christian Zachariasen agindupean; Christian Zacharias sarri etortzen da Hamabostaldira eta oraingoan zuzendari eta pianista gisa jardun zuen. Abuztuaren 22an, Hamburgeko NDR Elbphilharmonie Orchester orkestra Donostiara itzuli zen, lehenbiziko aldiz etorri eta 35 urte beranduago (hura izan zen jaialdian esku hartu zuen aldi bakarra); bere zuzendari printzipal gonbidatu Krzysztof Urbanskiren gidaritzapean, NDR orkestrak zur eta lur utzi zituen entzuleak kontzertuaren amaieran “Agur Jaunak” jo zuenean. Rotterdams Philharmonisch Orkest (abuztuak 24), azken hamar urteotan bere titular izan ostean orkestrarekiko konpromezua amaitzear den Yannick Nezet-Seguinekin, Hamabostaldiko publikoarekin berrelkartu zen; orkestra bere mendeurrena ospatzeko egiten ari den nazioarteko biran murgilduta dagoela etorri da Donostiara eta Hamabostaldiak bat egin nahi izan zuen ospakizun horrekin: Easo Eskolaniak “Zorionak zuri” eta doinu horren nederlanderako bertsioa kantatu zituen. Abuztuaren 27an eta 29an kontzertu bana eman zuen Budapest Festival Orchestra ere askotan izaten da jaialdian; izan ere, azken hamarkadan bosgarren aldiz dator Hamabostaldira; lehenengo kontzertuan, bere zuzendari Ivan Fischer-ek bertaratutakoen harrera ona eskertu zuen Brahmsen “4. hungariar dantza”ren jatorrizko bertsioa interpretatuz eta musikariak eurak kantatu ere egin zuten. “Amoria” ikuskizuna euskal musikaren gainbegiratze arrakastatsua gertatu zen eta Labèque ahizpentzat eta hainbat euskal musikarirentzako topagune bihurtu zen, esaterako Carlos Mena kontratenorra, Hegiak taldeko kideak eta Easo Eskolania; abesbatza horren eta pianisten duoaren arteko estreinako lankidetza Sir John Eliot Gardiner-ekin 2016an egindako lanean du jatorria: Katia Labèquek “Amoria”ren aurkezpenean kontatu zuenaren arabera, hura izan zen Easo Eskolaniaren berri  eman ziena, “munduko haur-abesbatza onena” dela esan omen zien britaniar zuzendariak. Bitxikeria horrek mahaigaineratzen du Musika Hamabostaldiak bertako abesbatzen eta nazioarteko artistentzako topaleku bezala duen garrantzia.

Kursaal Auditorioan eta Victoria Eugenia Antzokian izandako emanaldiez gain, Hamabostaldiaren musika-eskaintza osatzen duten askotariko zikloek interes bizia pizten dute publikoarengan. Esaterako,   Organo Zikloak 4.720 ikusle bildu ditu guztira Donostian eta zenbait gipuzkoar herritan izandako 13 kontzertuetan. Jotako errepertorioari dagokionez,  aipatzekoak dira hiru musikalanen erabateko estreinaldiak: Youri Boutskoren “Segundo gran cuaderno de órgano”, Josep Soler-en “Coral 22. Tiendo partido de mano derecha” eta Guridiren “Diez melodías vascas” lanaren transkripzioa, Musika Hamabostaldiak Juan de la Rubiari eskatutakoa. Obra berrien enkarguek eta estreinaldien politikak erakusten duten jaialdiak duen ardura sorkuntza berriarentzako motore eta plataforma izateko. Azpimarragarria da, halaber, Organo Erromantikoaren Nazioarteko Ikastaroaren arrakasta, aurten 35. aldira iritsi dena: urtez urte, eskakizunak plaza-eskaintza gainditzen du, mundu osoko organisten artean Gipuzkoako organo-ondare aberatsak sortzen duen jakin-minari esker.

¡

1991. urtetik Santa Teresa Komentuan egiten den Antzinako Musika Zikloaren edukieraren %98a bete da aurten. Ziklo horretan dohaintzen bidez bildutako dirua komentuko elizaren mantentze-lanetarako erabiliko da. Bestalde, Hamabostaldi Berdea epigrafean bildutako ingurumenaren alorreko politikaren barruan, ziklo honetan sortutako CO2 igorpenak konpentsatzeko, hainbat zuhaitz landatuko dira Gipuzkoan, Bosquia elkartearekin lankidetzan. Errepertorioari dagokionez, aurten Antzinako Musika Zikloak Barrokoan eta Errenazimenduan Iberiar Penintsulan, Frantzian, Italian nahiz Txekiar Errepublikan sortutako musika lanen aukeraketa bat aurkeztu du eta monografiko bat eskaini dio François Couperin-i bere jaiotzaren 350. urteurrenean.

Bigarren aldian, San Telmoko Musika Ostegunak %100eko bete dira. Finkatuz doa, beraz, ganbera musikaren eskaintza. Aurtengoan hiru kontzertu izan dira, The Brahms Project taldeak, Judith Jáuregui pianistak Lina Tur Bonet biolinistarekin eta Clara Mouriz mezzosopranoak eman dituztenak. Musika Hamabostaldiaren eta San Telmo Museoaren arteko lankidetza haratago doa: museoan izan zen Jordi Savallekin publikoari irekitako topaketa eta San Telmo Gauean musika klasikoko saio bat izan zen, Mikel Chamizoren eskutik. Gainera, “Artea eta mitoa. Pradoko jainkoak” aldi baterako erakusketaren gaia Hamabostaldiko programazioan islatu da zeharka.