• Tabakalerako Patio aretoan estreinatuko da abuztuaren 7 ostiralean, arratsaldeko 19:00etan.
• Kontzertua Marta Garcíaren libretoaren eta Grieg eta Hummelen musikaren gainean eraiki da, Easo Sinfoniettak, Easo Abesbatza eta Iker Murillo Studio24ko dantzarien esku-hartzearekin, Lucía Arzallusen musika zuzendaritzaren eta Iñigo Santacanaren zuzendaritza eszenikoaren pean.
• Sarrerak salgai quincenamusical.eus webgunean eta Kursaaleko zein Victoria Eugenia Antzokiko leihatiletan.
Abuztuaren 7an, ostiralean estreinatuko da Zomozorroak kontzertu pedagogiko dramatizatua, Tabakalerako Patio aretoan. Hori da haur, gazte eta familientzat Easo Abesbatzak eta Donostiako Musika Hamabostaldiak ekoitzitako ikuskizun berriena. Haurren Hamabostaldiko jarduera orok bezala, erabateko estreinaldi horrek Gipuzkoako Batzar Nagusien babesa du. Sarrerak quincenamusical.eus webgunean eta Kursaaleko eta Victoria Eugenia Antzokiko leihatiletan eros daitezke.
Zomozorroak 8 urtetik gorako lagunentzat sortutako kontzertu pedagogiko dramatizatua da, musika klasikoa, narrazio dramatikoa eta elementu bisualak uztartzen dituena. Honako hauek dira ikuskizunaren helburu pedagogikoak: narratibaren bidez musika klasikorako sarbidea erraztea; instrumentuak eta horien soinu-ezaugarriak identifikatzen irakastea; haur eta gazteengan musikaren inguruko jakin-mina piztea; musika, narratiba eta ikus-elementuak uztartuko dituen esperientzia sortu eta entzute aktiboa eta irudimena sustatzea.
Proposamena belaunaldi ezberdinetako hiru kontalarik musikazko bidaia bat partekatzen duteneko istorioaren inguruan egituratzen da: 11 urteko neska bat, jakin-mina, freskotasuna eta aurkikuntzaren perspektiba ematen duena; 18 urteko neska gazte bat, haurren inozentzia heldutasunarekin lotzen duena, eta gizon heldu bat, jakinduria, esperientzia eta sakonera narratiboa eransten dituena. Belaunaldi anitzeko egitura horrek adin guztietako publikoekin konektatzeko eta musikari buruzko belaunaldien arteko elkarrizketa sortzeko aukera ematen du. Egitarauari oharretan kontatzen denez, "musikariak intsektuak dira. Beti beltzez jantzita, maiz bizkarrean daroate janaria. Bakoitzak bere eginkizuna betetzen du, funtzioak irauten duen heinean, eta, ondoren, hurrenkera jakinik gabe, nahastuta ateratzen dira agertokitik. Akaso musikarekin ez nahasteko mozorrotzen dira musikariak intsektuz”.
Musika. Marta Garcíak idatzitako libreto baten gainean, hiru narratzaileek musikazko hainbat pasartetan barrena gidatuko dute publikoa, euren irudimena eta adierazkortasuna erabilita, instrumentuak nortasun propioa, emozioak eta gatazkak dituzten pertsonaiak balira bezala ulertzeko. Pasarte horiek instrumentu jakin batzuen tinbre- eta adierazpen-ezaugarriak nabarmentzeko izan dira hautatuak, publikoak tresna horiek identifikatzen ikas dezaten, eta, bestalde, atmosfera desberdinak sortzeko balio dutelako. Edvard Griegek (1843–1907) konposatutako Peer Gynt-en orkestra- eta ahots-numeroak, op. 23 (Henrik Hibsen antzerkigilearen Peer Gynt bertsoan idatzitako dramarako musika intzidentala) eta op. 46 (Peer Gynt, 1. Suitea), eta Johann Nepomuk Hummel-en (1778–1837) Tronpetarako 1. kontzertuko zati bat interpretatuko dituzte.
Lucía Arzallusen musika zuzendaritzapean, Easo Abesbatzaren baitan sortutako Easo Sinfonietta orkestra ez profesionalak interpretatuko ditu orkestrarako zatiak; ahotsetarako atalak David de Oliveiraren zuzendaritzapean, Easo Abesbatzak interpretatuko ditu, Martina Markuleta (tiplea), Larraitz Otamendi (sopranoa) eta David de Oliveira bera (tenorra) bakarlari direla.
Dantza. Narratiba osatu eta musikazko uneei dimentsio koreografikoa zein mugimendu eszenikoa emateko, Iker Murillo Studio 24ko dantzari talde txiki bat ariko da ikuskizunean.
Espazio eszenikoa eta diseinua bisuala. Proposamenak Iñigo Santacanaren zuzendaritza eszenikoa du, eta Tabakalerako Patio aretoaren ezaugarriak erabiltzen ditu 360º-ko eszenatoki bat sortu eta kontzertu klasikoaren ohiko frontaltasuna hausteko, hartara kontzertua erabat murgiltzeko esperientzia bilakatu asmoz. Horri esker, honako hauel lortuko dira: interpreteen eta ikusleen arteko zuzeneko konexioa; angelu guztietatik ikusgarritasuna, espaziorako sarbide bisual demokratikoa ahalbidetuko duena, publikoa narratiban erabat murgil dadin. Esekitako zenbait elementu bisualek ekintza inguratuko duen "sabai bisuala" sortuko dute, inongo angelutatik ikuspegia oztopatu gabe, ikuskizunaren konfigurazio zirkularra mantenduta.
Zomozorroak ekoizpen berriak eskaintzeko xedearekin 2018an abiatu zen lankidetza baten emaitza berriena da. Proposamen horiek, publiko gazteena entretenitu eta bereziki musika eta, oro har, arteak hurbiltzeaz gain, hezi eta inspiratu ere egiten dute; gainera, ikuskizunek jasangarritasunean, inklusioan eta hezkuntza-balioen sustapenean jartzen dute arreta. Haur eta gazteentzako musika-ikuskizunak sustatzen dira haur eta gazteek beren burua horietan islatuta senti dezaten, eta, aldi berean, beren gizarteko funtsezko alderdiekin konekta dezaten. Zomozorroak kontzertuaz gain, elkarlan horren emaitza dira Itsasotik eskolara (2018), Árbolaré (2020), Hirira (2021), Itsasotik (2022), Egia ala geRuza (2024) eta Nizugu (2025).
HAURREN HAMABOSTALDIA: "ZOMOZORROAK"
Abuztuaren 7a, 19:00. Tabakalera, Patio Aretoa
Easo Sinfonietta
Easo Abesbatza
Martina Markuleta tiplea; Larraitz Otamendi sopranoa; David de Oliveira tenorra
Iker Murillo Studio24 dantza
Lucía Arzallus musika zuzendaria
David de Oliveira kantu zuzendaria
Iñigo Santacana eszena zuzendaria
Marta García libretoa
Goretti Figueroa eszenografia eta atrezzoa
Itziar Garaluce, Edorta Subijana argiak
Eider Barrenetxea jantziak
María Jaunarena jantzien laguntzailea, jostuna eta karakterizazioa
Iker Bilbao produkzioa
Gorka Miranda koordinazioa
*Iraupena: 50 minutu
