Bach Collegium Japan

Musika barrokoaren txanda Kursaalen: Masaaki Suzuki, duela bi urte Hamabostaldiko Organo Zikloan parte hartu zuena, jaialdira itzuliko da, oraingo honetan, Bach Collegium Japanen gidaritzapean. Jatorrizko instrumentuen interpreteek eta abesbatzak osatzen duten taldea 1990. urtean sortu zuen Suzukik berak, Bachen interpretea, organista, klabezinista, orkestra-zuzendaria eta nazioarteko musikologo ospetsua. Aukera aparta izango da konpositore barrokoaren obran aditua den talde horretaz gozatzeko, Europan ez baita sarritan aritzen; izan ere, taldeak lehenbiziko aldia du jaialdian. Bach Collegium Japan "Bachen musika etorkizunera transmititzen duen" talde gisa definitzen da. "J.S. Bachen musika gizateriaren ondare komunaren parte da, eta Bach Collegium Japan sortu zenetik, Bachen musika Japoniatik mundu osora transmititzen darraigu. Gure nahia da ahalik eta jende gehienak musika zoragarri honen poza gurekin partekatzea".