• Ander Perrino eta Germán Ormazabal, Nacho Castellanos eta Mario Marzo zein Medinukai Ensembleren kontzertuak eta Kresala Dantza Taldeak, erabateko estreinaldian, Eduardo Chillidaren omenez Haizearen Orrazian eskainiko duen dantza-ikuskizuna izango dira.
• Gainera, Hamabostaldi Solidarioa Txara II eta Villa Sacramentoko egoitzetara hurbilduko da, Julia Blasco eta Suzana Nadejde sopranoen, Javier Povedan klarinete-jotzailearen eta Jorge Robaina pianistaren kontzertu banarekin.
Musika Hamabostaldiak ostegun honetan, abuztuaren 1ean, ekingo dio bere 85. edizioari, Inaugurazio Eguna osatzen duten doako hitzorduekin: ganbera musika, kantua eta dantza, sarrera librearekin aforoa bete arte. Eguerdian, bi kontzertu izango dira modu paraleloan: kontrabaxu eta piano errezitaldia, Ander Perrino eta Germán Ormazabalen eskutik, Donostiako Udaletxeko Batzar Aretoan, eta kantu eta piano errezitaa, Nacho Castellanos eta Mario Marzoren eskutik. Arratsaldean, berriz ere Batzar Aretoan, Ensemble Medinukaik haize instrumentuentzako ganbera musika interpretatuko du. Eta gauean, Haizearen Orrazian Eduardo Chillidaren omenezko "Hiru" dantza ikuskizuna aurkeztuko du Kresala Dantza Taldeak. Halaber, bere lehen egunean, Hamabostaldiko musika Txara II eta Villa Sacramento egoitzetara ere iritsiko da.
12:00etan, Udaletxeko Batzar Aretoan, Ander Perrino kontrabaxu-jotzaileak, Berlingo Deutsches Sinfonie-Orchesterreko kontrabaxu jotzaile nagusiak, eta Germán Ormazabal pianistak J.S. Bach, F. Hertl, S. Rachmaninov eta F. García Lorcaren obrak joko dituzte, azken hori kontrabaxurako Ander Perrinok berak transkribatua. Kontrabaxu-jotzaile gasteiztarrak 2010ean egin zuen debuta bakarlari gisa Euskadiko Orkestrarekin, Andrés Orozco Estradaren zuzendaritzapean, eta 2022an bere lehen CDa grabatu zuen kontrabaxurako eta pianorako sonata originalekin, IBS Classical zigilupean; gaur egun, proiektu ugaritan murgilduta dago, hala nola Linien Soundkraft konpainian, María Lindo oboistarekin batera musika beste diziplina artistikoekin uztartzeko sortua, konposizio-lanarekin batera; gaur egun, Germán Ormazabalek bere interprete-karrera kultura-kudeaketa jardunarekin uztartzen du, Euskal Herriko Gazte Orkestra Fundazioaren zuzendari nagusi baita; pianista gisa, bakarkako errezitalak eman ditu, eta bere kolaborazioen artean, besteak beste, koru-taldeekin eta goi-mailako artistekin egindakoak nabarmendu ditzakegu: Ainhoa Arteta, Ainhoa Garmendia, Pello Ramirez, Garikoitz Mendizabal, Xabier Zabala, Andoni Egaña edo Xabier Lizaso.
12:00etan, Kursaal Auditorioko Foyer-ean, Nacho Castellanos kontratenorrak eta Mario Marzo pianistak "A Quiet Voice Inside" programari helduko diote. "H. Purcell, G. Gershwin, R. Schumann edo T. Adès musikariek poesia motor komun gisa bilatzen duten soinu galduen ozeano batean bat egiten duten musika erritu musikal” gisa aurkezten dute berau. Nacho Castellanosek bakarlari gisa lan egin du Santa Cecilia Orkestra Klasikoa, Orkestra Filarmonikoa, Zamorako Gazte Orkestra, etab. bezalako orkestrekin batera, Kynan Jones, José Luis López Antón eta Pascual Osaren gidaritzapean, besteak beste, Musika Auditorio Nazionalean, Teatros del Canal antzokietan, Alcalá de Henareseko Corral de Comedias delakoan, Zamorako Antzoki Nagusian edo El Paular Monasterioko Arte Sakroaren Nazioarteko Jaialdian edo Musika Hamabostaldian; 2023an Gato Murr ensemblea sortu zuen, errepertorio barrokorik ezagunenaren eta aurkitzeke dauden musika-lan bitxien arteko oreka bilatzeko asmoz. Mario Marzo pianistak Extremadurako Orkestraren 22/23 denboraldia ireki zuen, Juanjo Menaren gidaritzapean, eta bakarlari gisa aritu da Tenerifeko Orkestra Sinfonikoarekin, Gaztela eta Leongo Orkestrarekin edo Kordobako Orkestra Sinfonikoarekin, Musika Auditorio Nazionalean, Madrilgo Teatro Real antzokian, Teatros del Canal antzokietan... eta errezitalak eman ditu Scherzo Fundazioaren Interprete Gazteen zikloan, Bartzelonako Hammerklque International Series-en, San Frantziskoko Steinway Hall-en eta Berlinen; pianista-ibilbidea interpretazioarekin eta Sare Sozialetan dibulgazioa egitearekin uztartzen du, 500.000 jarraitzaile baino gehiagorekin.
18:00etan, Udaletxeko Batzar Aretoan, Medinukai Ensemblek haize seikotera egokitutako programa bat interpretatuko du: W.A. Mozarten Flauta magikoaren Obertura, M. Kabelacen Haizerako sextetoa, B. Brittenen Haize seikoterako mugimendua, P.M. Duboisen Sinfonia da camera eta M. de Fallaren La vida breve lanaren Danza española nº1. Medinukai Ensemble Musikenen (Euskal Herriko Goi Mailako Musika Ikastegia) sortu zen, Álvaro Prietoren babespean. Medinukai osatzen dutenak dira Salvador Ruiz (fagota), Guillermo De La Riva (klarinete baxua), Paola Barba (klarinetea), Jorge Pablo Fuentes (oboea), Lucía Moya (tronpa) eta Eider Diaz (flauta/piccoloa); XX. mendeko errepertorio anitza eta ez oso konbentzionala esploratzea dute helburu, eta, batzuetan, oraingoan bezala, konpositore klasikoekin konbinatzen dituzte; ensemblearen tinbre bereizgarrien artean, klarinete baxuaren eta piccoloaren soinu bereizgarriak daude, eta horiek dimentsio paregabea eta askotarikoa gehitzen diote haren musika-interpretazioari.
21:30ean, Haizearen Orrazian, Kresala Dantza Taldeak "Hiru" ikuskizuna emango du primizian, Hamabostaldiak Eduardo Chillidaren jaiotzaren mendeurrenaren ospakizunarekin bat egingo duen ikuskizunetako bat. "Elkargune gisa, kutsu klasikodun itsasora irekitako plaza horretatik, non hiru eskultura itsasoan eta mendian kokatutako hiru harkaitzetatik sortzen diren [...], dantza Kuroien arte arkaiko grekoaren geometriatik abiatuta adierazpen metakorrera egokitzen da, zati baten uneko abstrakzio liriko zorrotzera. "Hiru" dantza, musika eta poesia txirikordatu bat da, metamorfosian bibratzen duen obra bat bezala grabitatzen duena, bere ahotsa atereaz, bertatik darizkion aromak lotuz eta gurutzatuz, haiku japoniar batean bezala, erritmo sotil, intimo eta keinu delikatuz". Ikuskizunak oinarri ditu San Juan de la Cruzen "Cántico espiritual" (Orixeren itzulpenean) eta Händel, J.S. Bach, Vivaldi, Shostakovich, Tucker, Savall, Imanol, Karlos Giménez, Joxean Goikoetxea, Enrike Solinís eta Miren Zeberioren edo Elena Mungiaren musikaz; zuzendaritza artistikoa eta koreografia Faustino Aranzabalenak dira eta Idoia Ibarzabal aritu da dantza-maisu, Paloma de Albak sortu ditu jantziak eta Inma Irazustabarrena diseinatu du argiztapena.
Urtero jaialdia irekitzen duen Hamabostaldi Solidarioaren esparruan, Julia Blasco eta Suzana Nadejde sopranoek, Javier Poveanek (klarinetea) eta Jorge Robaina pianistak kontzertu bana emango dute Txara II eta Villa Sacramento egoitzetan, egoiliarrei, haien familiei eta bi zentroetako langileentzako, Mozart, Puccini, Schubert, Offenbach, Rossini, Brahms eta abarren obrak interpretatuko dituzte.
Inaugurazio Jardunaldiaren barruan dauden doako kontzertu horiez gain, jaialdiaren lehen eguneko programazioa osatuko dute Kursaal Auditorioko kontzertu-zikloaren irekierak, Gustavo Gimeno zuzendari titular duen Orchestre Philharmonique du Luxembourg orkestraren eskutik, eta Hamabostaldian debuta egingo duen Bruce Liu pianista bakarlari dela, eta Ana Aguado eta Ana Belén García organistek eta Jaume Santonja eta Manuel Martínez perkusionistek Donostiako San Bizente elizan eskainiko duten kontzertuak.
INAUGURAZIO EGUNEKO DOAKO KONTZERTUAK
Abuztuak 1
Ander Perrino eta Germán Ormazabal
Udaletxeko Batzar Aretoa (12:00)
Nacho Castellanos eta Mario Marzo
Kursaal Auditorioko Foyer-a (12:00)
Medinukai Ensemble
Udaletxeko Batzar Aretoa (18:00)
Kresala Dantza Taldea
Haize Orrazia (21:30)
HAMABOSTALDI SOLIDARIA
Julia Blasco, Suzana Nadejde, sopranoak; Javier Povedano, klarinetea; Jorge Robaina, pianoa. Txara II eta Villa Sacramento egoitzak
